Tum Bin...

Nazar ghuma ke dekha to har taraf 'couples' nazar aa rahe the. Door se dekho to kitne khush maloom ho rahe the saare. In sab mein lazmi tha ki tumhari yaad aayi. Ek kasak si hui tumhe paas paane ki. Ek tees si uthi seene mein ki hum to jab saath hote hain to saare jahan ki khushi bas humare beech hoti hai. Doston ke beech bhi rahoon to akela sa lagta hai. Kahan 'complete' hain hum ek doosre ke bina. In sab mein tum saath nahi hote to dil udaas sa ho uth-ta hai.

Jaane kab se isi aas mein baithe hain ki ab milenge to tab milenge. Khali sa lagta hai mann, veeran si zindagi. Lagta hai jaise khushi humse rooth kahin door jaa baithi hai. Ab shayad tum hi le ke aao use apne saath. Yaad aate hain wo hanste -khilkhilate lamhe jo hum-ne saath guzare the. Jab bewajah hi ek doosre ko chidhaya - gudgudaya tha. Jab ek-doosre ko dekh bin-wajah muskuraya tha. Inhi lamhom mein to shayad tumhe zindagi banaya tha.

Tum kehte ho intezar to karna padega. Kaise karen, ye bhi to bata do tum. Tum bin zindagi badi sooni hai re. Tum aao to rang bhare zindagi mein...

2 comments:

Piggy Little said...

ek hi shabd hai humaare paas. hats off boss.

itni aas, itni kashish.
itni kashish....

lovely.

reema said...

:)
bohot hi khubsoorat.