Zindagi, teri talaash abhi baaki hai..

Kabhi soochun to lagta hai zindagi abhi baaki hai. Kabhi lagta hai jaane kya kya gawanya hai maine. Peeche mud ke dekhoon to lagta hai har mod pe galtiyan ki hain maine. Aaine ko dekhoon to dil kehta hai zindagi gawa di tune. Jaane kya kar sakta tha, jaane kahan ho sakta tha... Kyon kiya khud ka ye haal? Peeche dekhoon to khud pe gussa aata hai. Aage dekhoon to dil ghabraata hai jaane kya hoga? Phir se wahi galtiyan to nahi doharunga? Kabhi aage chal mud ke dekhoon to pachtaunga to nahi?

Kabhi lagta hai khud se jyada to nahi 'expect' kar liya tha, kuch jyada hi sapne to nahi dekh liye the? Lagta tha sapne hi zindagi ki raah ka pehla kadam hote hain. Aaj lagta hai jaane kitne sapne peeche choot gaye, jaane kitne yun hi bhula diye. Jaane kitni raahen chod main aaj is mod pe khada hoon.

Phir kabhi lagta hai, zindagi to chalti rehti hai, kabhi tham-ti ruk-ti nahi. Wo to shayad hum hi nirash ho uth-te hain zindagi se. Andar ka bachcha kehta hai zindagi kabhi humse naaraz nahi ho sakti. Sapne kahin khoye nahi honge, wo to bas ek kone mein dubke intezar kar rahe honge humara. Zaroorat hai agar kuch to shayad khud ko pehchan-ne ki. Sapne to man dher saare dekhta hai, dekhta rahega. Chahiye humen ki un sapnon ko talaashein jo sach mein dil ke kareeb hon, jo dil ko khushi dete hon. Inhi sapnon ko anjaam dena shayad zindagi ho. Inhi raahon mein shayad zindagi kahin mil jayegi humen. Zindagi, teri talaash abhi baaki hai...

3 comments:

Minakshi said...

Mann hazaroin sapne dekhta hai, unhe hum tak jodta hai...
Aur har ek sapne mein humaara ek ansh hota hai.

Aur jo raah humaari zindagi, humaare bartamaan ko us sapne tak jodti hai, woh humein saath-saath itne tazurbein de jaati hai ki sapnoin ke tootne ka darr dhoomil sa ho jaata hai...
Agar tum apne un tazurboin ke baare mein socho toh tumhe bhi lagega ki har ek sapna kuch de gaya hai.

Phir woh sapna adhoora hi kyun na reh gaya ho...

Piggy Little said...

mere pyaare philosophers ki jodi, dono saath mein bahut achche ho.
isiko kehte hai, complement karna :)

love u, both.

n.

Pallav said...

@minakshi : :*
@neha : :)