Khud se baatein...

Bahut din ho gaye phone pe kuch likha nahi. Blog pe bhi nahi. Shayad bahut dinon se kuch soocha hi nahi. Nayi job mein settle hone ki bhaga bhagi meinn reh gaye honge. Yahan Barista mein baithe bematlab ki baatein likhe jaa rahe hain. Shayad zaroori bhi tha, kaam dham, world cup, aur ghar bar ki 'humdrum' se door hona. Abhi ehsaas ho raha hai internet se kabhi kabhi door hona kitna zaroori hota hai. Information overkill mein shayad original thoughts kho jaate hain, ya hum bekar ki baaton mein itna ulajh jaate hain soochne ka mauka bhi nahi milta. Solitude, jis-se mera purana rishta tha, lagta hai rooth gaya hai mujse. Khata bhi shayad meri hi hai, main hi us-se chipta firta raha. Aaj barista ke ek soone se table pe, der raat, paya hai use. Man ab thoda shant lag raha hai. Ab jaane nahi denge tumhe, dost. Der raat baramde pe coffee peete, sooni raahon pe car chalate, bewaqt tehelte tehelte mil liya karenge tumse.

Pata nahi, likhne baithe to bahut kuch soocha tha, lagta hai sab kho gaya kahin purani yaadon mein. Haan, ye ki naya job to acha hai. Log bhi ache hain. Kaam bhi acha hai. Itna ki shyad bahut dinon baad zindagi se shikayat nahi. Haan, Minakshi abhi paas nahi, lekin pata hai kuch dinon ki baat hai. Lekin soochne ki baat ye hai ki kya yahi zindagi hai - ek acha job aur zaroorat ki cheezein? Shayad main sawal hi bahut karta hoon. Ya shayad sawal hi galat poochta hoon. Pata nahi...

Coffee khatam hone ko hai. Dukan band karne ki taiyariyan chal rahi hain. Abhi to 11 bhi nahi baje hain. In baaton mein Bombay bada acha tha... Der raat akele tehelte raho, befikar, apne khayalon mein. Car ho phir to raat apni hai... Dilli mein wo baat nahi. Gurgaon to mujhe soul-less lagta hai..

Soocha jaye to kabhi kabhi khud se ki baatein bhi yaadgar conversation ban jaati hain...